教育精神在哪裏

頭先睇午間新聞見到有個媽媽係大雨大風下的八號風球之日為了派籌問題，係camera 前講了一句教育精神在哪裡，要求佢排緊隊間學校馬上派籌...

係呢件事上我見到幾個問題

1) 學生方面，會考都放左榜幾日，搞到今日都仲未搞完的，成績係點我諗我唔使寫出黎。撫心自問，會考真係咁難 ? 你中四中五買返黎D書用黎做乜 ? 每日上課果八個鍾係度做乜 ?
大約九年幾、十年前我都考過會考，果陣六科加埋都有二十尾三十分，放榜果日除左用少少時間諗緊好唔好轉校(果陣好想讀男女校，XDD，莊啟程果陣開始出名，心思思想轉過去)之外，我記得大約點幾兩點就搞完所有手續讀中六，歸家食飯。
其實都係老生常談，只要你係有聽書 + 睇書間書記重點，就算好似我咁無乜做功課 (我真係唔鍾意做功課，試過無數次比唔同miss 同阿sir 當住面屌都係咁)，都可以連續六年全級第一 XDD。記得中四每隔幾個月出去玩比賽，升中五個暑假又日日追睇tvb足球風雲，下午出去躝街，都唔知幾開心，不過 good days were old days 了。

2) 家長方面，我覺得態度上佢有問題。大佬，八號波呀，邊個會返學校做野呀 ? 你個女、個仔要重讀升讀固然重要，但唔係大曬，學校工作人員都係打份牛工姐，唔通你要人地冒住危險返工為左你去派膠 ? Don't be on9。係度好似刁民咁大吵大鬧，同果D我所見的無讀書無文化的大陸人無乜分別。仲有，你個女個仔讀得中五，都十七八歲啦，佢地唔讀書，就要對自己 responsible，你應該比佢地自己搞返重讀升讀派籌，讀書果個唔係你，只有咁樣佢地先會感到出面係乜野世界，學識planning同做 decision，令佢地感到徬惶佢地先會大、成長。

3) 學校方面，都打緊八號波，又落大雨，做乜唔比人入去個禮堂避雨呀 ? 我相信學校仲有校工係度的，其實只要個校長/校監打個電話落去，個臨時 arrangement 又有幾難呢 ? 一D同理心都無，果D學校負責人都係仆街黎 !

4) 升讀重讀方面，都已經2008年，點解讀U報 JUPAS、改priority 可以電腦化，阿婆輪街症可以電腦化，但升讀重讀中五中六就無，點解仲要沿用逐間排隊、等派籌的做法 ? 想當年報 JUPAS改priority要去 HKU 或 CityU做，條隊長到無法形容，一個又一個的蛇餅更出現係隊中唔同位置 !! 我無讀過cs，唔係IT人，不過一個咁的 system 應該唔難，個system 可以central 、regional 或者學校 based，學生input 資料，揀好升讀重讀，揀好心水學校，submit，central / regional based 的話，就跟據choice feed 去果幾間學校做 screening 同 interview。其實我諗成個flow就同大公司的 job application 差唔多，可以 implement 到的話，學校、老師、家長同學生都係贏家，係個 all win 的 situation。學校唔使再派膠、老師減少左 ineligible application同interview、家長同學就坐定定等call。