蔡瀾的生活方式 & 蔡瀾的生活方式 II: 如果有睇蔡san星期日的蔡瀾嘆名菜的話，就知道個節目99%都係取材自呢兩本書。節目講過的，本書一定有提及。當然有部份內容只係書先有，例如介紹賣文房四寶商店、賣古董玩物、訂西裝專門店等。比較睇書同睇電視，睇書有一樣好，就係書會列出相關商店的地址，好似我咁鍾意飲飲食食周圍去的人就最方便啦。
閒讀偶拾: 記得有位好叻好叻的世界仔朋友，傾完project後，問我過最近睇緊乜野書，我唔記當時點樣答，不過我就好記得佢叫我不如睇下"林行止"的書，話內容唔錯，幾適合我，仲話我應該幾鍾意睇。知唔知我當時點答 ? 我諗返起都覺得好白痴，我話: "乜林行止唔係信報寫社評果個咩 ? 睇舊的社評集有乜咁好睇 ?"見佢只微笑曰: "唔止社評，佢有寫其他野，你睇左就會明白。"我之後去圖書館，但發覺來來去去都係社評集要，睇左一兩頁就放低了。好多年之後的今日，有一次好偶然的機會又睇到林行止的書，看上三兩篇後，真如友人所謂，作者的確有別的寫作題材。題目天南地北、有時談古論今，又會說文解字，更會笑談東西趣聞，真係"unputdownable" 哈哈。講起呢位友人，其實係短短三年間仲有好多人事老是顯出佢的才智才能，當時已知他非池中物，的確，友人如今已是係跨國大型能源公司行政人員，上天是公平的。
與CEO對話願景與睿智: "與CEO對話"系列每出一本我都會睇，因為記得我為閒人期間，一位世叔見我係度睇陶傑書集就話"佢寫既野係就係嬉笑怒罵幽默風趣，但你睇完之後學到乜野呢?請你答我"我果陣真係答唔到，世叔之後係佢個大書櫃度攞左本幾個星期前先出版的與CEO對話比我，話"你剛出黎做野應該多睇係呢類書，可以認識呢個商業社會的人與事，以彌補你大學主修的不足"。返到屋企打開本書，發覺佢不但間底書入面的重點，仲係空白處寫左好多NOTES。我呢位世叔果陣未到五十已退休數年，對話之際為一間前大學校長的科技公司做 part-time 技術顧問，利害! 講得太遠了，與CEO對話系列最初之時的確幾好睇，每次會就一個主題請嘉賓分享以往的經歷。不過，最近幾本係形式上好似有點改變了，由主題 ORIENTED 變成嘉賓ORIENTED。好似呢本咁，係由嘉賓講下佢同公司同日常事務，有點沒有主題可言，唔知係變好定變壞呢 ?
圖解中國國情手冊: 雖然我經常要跟上面的人接觸同工作，但睇完本書先知我對中國只識皮毛。呢本書可以話係一本官方刊物，所以一D西方傳媒最有興趣的題目係隻字不題的。
講師講股: 垃圾，內容空泛，只係綜合同總結我地已知的事實。文字非常差，每一篇，記住係"每一篇"都使用大量的"再者、其次、最後、事實上、其實、筆者相信、總括而言..."就咁睇就知用英文直譯中文方去寫啦。或者我太殘忍，每次睇財經專欄我有時會以孔少林、原復生的寫作水平、分析同內容作去比較。
金的法庭故事2: 精彩、好睇。不過唔知係作者的偏見定係事實，係作者引率的案件入面，往往警察果方的都係非常蠱惑，有好幾個case仲係比法官定罪，如果事實如此，我覺得幾恐怖下。我有好幾個朋友畢業後成為警察，仲有兩位係督察，希望佢都唔係好似書中所講咁。
西班，牙不遠: 小弟無乜閒錢出外旅行，唯有睇下呢D書當去過啦。 XD
沒有留言:
發佈留言