先講蜜蜂電影。老實講，洋鬼子動畫片除左 Pixar 外，其他的都好少睇。我之所以有套 Bee Movie，係因有次出街見到有間DVD地舖播緊，見套野D色水幾 sharp，蜜蜂仔個CG造型好靚，所以就有少少性趣去睇下。開頭十分鍾個故仔都算幾得意的，講下蜜蜂個世界又講下點樣分工合作，之後慨時間就慘囉，點形容呢，我睇到一半左右，不時內心爭紮："好唔好 cut 左佢，睇第二套好呢"。總的黎講，個故仔虎頭蛇尾，由隻蜜蜂仔走失，可以講講下講到去隻蜜蜂去左法庭做律師到最後搾飛機......個故仔真係好垃圾。我懷疑夢工場班人做故仔果陣佢慨目標係邊個 ? 小朋友 ? 如果係就唔會玩上法庭，"Larry Kings"同"工作的意義"呢類咁慨成人味題目；又如果target係大人呢 ? 如果係就唔會蜜蜂搾飛機、蜜蜂律師事務所等咁白痴慨情節。我覺得作故仔果個今次好貪心，既想取悅小朋友，又想吸引大人睇，到最後就變了個大雜會 (少少歷險 + 無聊人蜂戀 + 悶到差D訓慨司法大戰 + 0 高潮的撥亂反正)。其實我係欣賞疑夢工場今次的人物造型，睇落幾富有現代感的，帶點 Pixar 味度。可惜個故仔好爛好亂，故仔唔得，就乜都係假。又其實DreamWorks當年的 Antz真係幾正，同當年 Pixar的 A bug's life 可謂不分高下，可惜夢工場後繼不力，其他的都可以話幾失敗。
到左魔法奇緣，標準廸士尼式歌舞劇，相比之下，呢套好過第一套DD。不過我最唔鍾意同覺得噁心就係個女角 call 幫手執屋果幕，境然係曱甴同老鼠!! 呢個 joke 真係非常之差。唔通個作者想暗示 New York 得返呢D小生物嗎 ? 成個故仔都算過得去，一開頭的動畫好有一種六七十年代廸士尼 feel，只係唔鍾意最後女巫大戰公主果幕。我覺得最後要點樣戰勝巫婆可以寫好少少。總好過睇住個巫婆變成隻不倫不類的紫龍大玩 kingkong 呀，你話係咪先 ?
最後係戰狼300，三套電影比較黎講，呢套當然係最正啦。成套片一氣呵成，將溫泉關戰役(Battle of Thermopylae)，以電影手法呈現係影幕面前。不過有三點我想講，首先我就唔係好 buy 電影入面使用果種黃黃舊舊的風格，點解要採用呢種 style 呢 ? 正常的色 tone 唔好 ? 第二，果兩場露點戲有需要嗎 ? 雖然有得睇下D囡囡唔係話唔好，不過係戰狼300入面有需要嗎 ? 最後就係唔少人都有講過，電影入面好明顯將波斯人妖魔化。上網爬文，波斯人係信奉穆斯林的古代伊朗人，唔通作者有意或無意恐怖化或歧視伊朗 /穆斯林 ? 我知史詩式英雄電影入面反派越係邪惡，就越反襯英雄的可貴同正義。不過戰狼300話曬都係based on 歷史，入面的波斯人實在有點兒那過。下面係wiki 關於溫泉關戰役的史實，原來果場大戰仲有3000 人參與 !!http://en.wikipedia.org/wiki/Battle_of_Thermopylae
沒有留言:
發佈留言